ஷாராஜ் கவிதைகள்

என்னால் நிச்சயமாக
சொல்ல முடியும்
நான் காணாமல் போய்விட்டேன் என்று
நம்புவது உங்களுக்கு சிரமமாகலாம்
நேரில் நானே தெரிவிப்பதால்
ஒருவேளை நீங்களும் இதை
உணர நேர்ந்தால் அறிவீர்கள்
என்பதும் உறுதி, ஒரே ஒரு சந்தேகம்
காணாமல் போவதற்கு முன்பு- நான்
இருந்தேனா என்பது மட்டும்.
--------------------------------------------------------------

வந்தமர்கின்றன நீலங்கலந்த சாம்பல் நிறம்
கழுத்தசைவில் பச்சை மெஜண்டா
கருநீலம் எனக் குழம்பி மின்னச்சிலதும்
கறுப்பில் சிலதும் - இரண்டும் கலந்து சிலதுமாய்
கோபுரத்தில் புறாக்கள்.
ஆகாசத்தின் விரிந்த மனசையா
இரைதேடிச் சலித்ததையா
எதைப்பேசி முணுமுணுக்கின்றனவோ
தங்களுக்குள்,
அண்ணார்ந்து பார்க்கும் கண்களுக்குச்
சிக்குவதில்லை புறாக்களின் ரகசியமொன்றும்
கோபுரத்து பொம்மைகளுக்குமப்படியே
உற்றுப்பார்த்தால் இன்னொன்றும் தெரிகிறது
எள்ளலா விகசிப்பா எனவறியாதபடிக்கு
உறைந்திருக்கும் அப்பொம்மைகளின்
காரைப் புன்னகை.
---------------------------------------------------------------------